ВИТАМИНКА АД

Успешната приказна на Витаминка започна пред 60 години. Таа е основана во 1956 година во Прилеп како компанија за црвен мелен пипер. Производство на само еден производен асортиман беше доволно за цели 18 години успешно работење, се до 1974 година. Од фабрика за производство на мелен црвен пипер, Витаминка со новата бизнис стратегија започна да го гради својот пат кон успехот, прераснувајќи во компанија лидер во прехранбената индустрија на македонскиот пазар, која веќе 60 години непрестано ги задоволува потребите на своите потрошувачи. Со зацврстувањето на позицијата на домашниот пазар, паралелно и интензивно растеше и присуство на странските пазари каде што моментално пласира околу 45% од своето годишно производство во околу 30 земји во светот. Под слоганот на компанијата „Свет на вкусови" се наоѓа широката палета на производи од околу 350 типови на пакувања. Тука се подразбираат вкусови за најмладите, како слатки, така и солени, но не се исклучок и возрасните кои се исто така верни корисници на зачините и другите додатоци во исхраната. Тоа вклучува производство на различни вкусови (слатки, солени, кисели и лути) во форми на ужина, чоколади, десерти и бонбони, голем избор на пудинзи, пастеризирани производи, кечап, мајонез и различни сосови, вкусни супи и други додатоци за храна, како и бројни инстант производи, сирупи и филтер чаеви. Највпечатливи и најпознати брендови на Витаминка се популарните и вонвременски Стоби Флипс – идеална ужина за сите генерации во секоја пригода и во секој дел од денот, инстант витаминскиот пијалак Цевитана и Атлантис - чоколадните морски школки со уникатен и квалитетен вкус. 2018 година е особено значајна за Витаминка, односно брендот Стоби Флипс, кој го слави својот 40-ти јубилеј. Мисијата на Витаминка е создавање на високо квалитетни производи кои влегуваат во светот на вкусови, широка достапност и присутност на производите на Витаминка во секој момент во секој дом. Визијата која компанијата ја има поставено пред себе е развивање на брендовите на Витаминка со цел градење на имиџот - број еден компанија за производство на храна во Македонија и регионот.